Hallo iher Liebä

Gäre mecht i euch verzelle, wie i zu miim Hochziitschleid bi cho.

Am 28. Juni 2021 bin i mit miire Trouziigin (Cosis) und miim Mami uf Stans. Miis Ziil – zwische däne viele hundert (oder sogar tuusig Chleider) findeni „das Eine“. Ar gliiche Strass z’Stans hed Carol ganz am Afang vo iisere Beziehig ire WG gwohnd. I bi immer gspannd gsii uf die scheene niue Chleider im Schoufeischder. Scho denn hani gwisst – wenn i mal hirate, de hanged da miis Chleid! Und etz, 7 Jahr später ischs sowiit.

Nach erfolgter Absicherig bi Carol, was de är fir Winsch a miis Chleid hed, sii mier voll motiviert loszottled. Miiner Vorstellige hani churz und knapp bekannt gä und Carol siiner nid sehr hilfriiche Isserige wie „es muess halt eifach buum mache“ oder „ersch wenn is a dier gsee weissi obs gued isch oder nid“ gekonnt wägglah. Und de ischs o scho az Probiere gange.

Nach 75 Minute und 6 verschiedene Chleider isch o bi mier klar gsii – z’vierte ischs! Cosis und z’Mami sii sehr froh gsii, ha o i das inzwische gmerkt – fir sie isch das scho lang klar gsii. Und dass es z’vierte wird sii, isch o scho vorprogrammierd gsii. Schliesslech isch das bi miire Touziigin vor es paar Jahr genau so gsii.

Z’Bschdellformular isch usgfilld wordä, d’Underschrift gsetzt – und de hez endlech äs Glesli Cüpli gä. Uf miis Brutchleid! 🙂