Rotwyy oder doch lieber Wisswyy? es gid ä feinä Wisswyy und natirlech o ä feinä Rotwyy
Iises Ziel anem heissä Summerabe (24. Juli) isch klar gsi…mier wei zämä mit Kurt und der Eliane iisä Hochziits-Wyy im Alfreds ussuechä.
Also sii mier z 4. los gschrittä und hei iis ufä Wäg a Holzkuhplatz 1 gmacht. Da mier iis bi Trouffers fir die Wyy-Degustation hei agmäldet, sii mier scho mit villnä Wyy-Gleser begriesst worde. So hei mier o gad mit de erschte Wyy chennä afa.
Mier hei zum Apéro die 4 verschiedene Wisswyy probiert und zämä diskutiert, welä etz ächt am brävschte fiir iisi Hochziit wäri.
Dr klar Sieger isch de schnäll gfunde gsii. Zum Glick hei mier ä ähnleche Gschmack…
Nachdäm mier iis es feins z’Nacht usgsuecht hei, sii mier ufe Rotwyy umgstiegä. Mier hei iis da im Vorfeld fir 3 Uswahlmeglechkeite entschiedä gha und nachem erschde Schluck heimer scho dr erschd chenne striichä. Dä hed iis allne nid passt. Aber scho wie bim Wiisse hei mier o bim Rote schnäll dr Sieger gfunde.
Somit hei mier dr räscht vom Abe gmietlech chenne la usklinge und gniessä. Scho wieder ei Punkt vor Checklischde zum abhäglä. Aber es gid geng no viiiiil Pendänze zum abarbeite…und dr 16. September chunnd geng wie schnäller. Lengwiilig wirds iis also nid 😉
