... aber mier miessä ja vorbereitet si ... Gelbsucht, Starrchrampf, Hepatitis A, .... ja das alles bruchä mier ... fir iisi Hochziitsreis...
zum Glick isch iisä Hochziitstermin am Morgä vor Standesbeamtin bestätiged worde. Etz chei mier i iiserä Hochziitsplanig wiiterfahre.
Deswägä hei mier nachem Mittagässä z’Thun ir Reisepraxis Niesen e Termin gha. Mier wei abkläre, was mier alles fir iisi Hochziitsreis bruchä – insbesondere fir uf Kenia.
Nachemnä churze Gspräch midem Dokter hei mier gwisst, dass nid bi eirä Spritze wird bliibä….
Da freud sich d Lisa ja scho extrem druf…aber da cheme mier nid drum um. Also hocke mier scheen brav härä und häbe iisi Ärmli häre.
Zersch chunnd d Lisa dra. Ganzi 3 Spritzi darf/mues si sich la mache und wählt gschickt z lingge Ärmli us. So cha am nächschde Tag zmindschd mit 5 Finger z 10-Finger-System agwended wärde…
Aua! Tends scho fasch vor dr erschte Spritzä…aber siehe da, alli 3 impfigä sii ohni Problem gange. D Corona-Impfig sigi also schlimmer gsi 😉
Bi Carol heds no 1 zuesätzlichi Impfig gä und so hed er halt 4 picksä übercho. Komisch, da hed er o scho meh gspirrd als bi dänä.
Gspannt simer gsi, wär wie vil nachträglich wird merkä. Dä Sieg geid ganz klar ad Lisa wo d Impfigä no meh und lenger gspird hed. Aber o hie – niid gäg Corona…
Aber hei, etz hei mier immerhin dr gälb Impfuswiis (international) und mit däm chei mier iisi Hochziitsreis i Agriff nä.
Etz fähld nume no eppis – z rote Biechli fir d Lisa. Lisa Luchs wird Lisa Stähli. Sofort ga die niu Underschrift lehrä, die muess fire Termin im Juli sitze…
