Spaghetti, Spaghetti! ...und das bim erschde Date...
Am Friitig, 22. Ouguschd 2014 hani z’erschde Klassäträffe im Adler z’Brienz gha. Am 8i sii alli mied gsii und hei. D’Rubi Linda und i sii no gar nid mied gsii und hei beschlosse dr nächschd Zug uf Inderlache z’nä und dert no i Usgang z’ga. Wo mier gad hei welle ufbräche sii zwei Type i Adler gspazierd. Die zwee kennd mä doch! Flück Christian und Stähli Carol. Sie chemä cho Billard spielä. Nach eppis Uberziigigsarbeit hei sech die zwei Manne iis zwei Froue agschlosse und entschidä, äbäfalls uf Inderlache z’cho. Da Carol scho hed chennä outofahre, hei mier nid mit em Zug miesse ga – o gäbig 🙂
Sehr schnäll isch d’Sprach ufä Friitg vore Wuche cho. „Da hed ihn doch tatsächlech am Morge friehi eini vor Gmeind usem Bett gliitä und ihm no gad z’Wasser ono abgstelld!“, meind Carol mitemne Ougozwinkere zu mier. Ja, die Gmeindler geng, ä frächheit… Und warum isch Carol etz a däm Friitig deheimä gsii? Dr 15.8. isch Mariä Himmelfahrt und im Kanton Uri (Altdorf) schaffed denn niemer.
Nachemne coole Tanzabe i de Clubs Metro und Caverne z’Inderlache hei sech d’Wäge wieder trennd.
…oder nid ganz. Chum deheimä acho, hani ä Fründschaftsafrag im Facebook ubercho. Klick, Freundschaft annehmen. Neue Benachrichtigung – Carol Stähli gefällt dein Foto. Messenger: Carol Stähli hat dir eine Nachricht geschrieben. So isch das no ä chlei hin und här gange bis doch o iis sii d’Ouge zueghiid 🙂
Am nächschde Tag hei mier iis flissig via Facebook gschribä. Irgendeis isch de d’Frag vo Carol cho, ob i ihm ächt nid miis Handynummero chennti gä. „Isch chlei gäbiger zum Schriibä“. Jaja, gäbiger, scho klar! Aber i wott ja nid so sii 😉
Nach vilnä vilnä Stunde zämä schriibe bini iglade worde fir uf Stans z’cho und am Abe zämä uf Luzärn i Usgang z’cho. Cool! Da bini no nie im Usgang gsii – bini sofort derbie. Z’Mami hed das mitemne Lächle und emne „Aha“ zur Kenntnis gno (nachdäm i natirlech gseid ha wär das isch) und am Friitigabe (ja, scho wieder Friitig), am 5. September 2014 isch mii Wäldreis mit em Zug losgange.
Z’Alpnach hed mi Carol de mit em Outo abghold und mier sii i sii WG uf Stans. Dert hez feini Spaghetti gä. Super, usgrächned Spaghetti bim erschde Date – da chani mi ja nume blamiere! Aber das ganze isch ufallfrii uber d’Bühni gange – das chenne mier gengno fasch nid gloube, so wie i hiit Spaghetti isse…
Nachdäm mier iis dr Mage gfilld hei, sii mier mit em Zug uf Luzärn und hei e coole Abe zämä gha. Natiirlech nid ohni Folge… Dr Funke isch ubergsprunge und mier hei iise gmeinsam Wäg am 06.09.2014 gstarted 🙂