Am Donnstig 10. Februar bi o ig mit miim Trouziig und dr Lisa’s Trouziigin uf Azugssuechi gange.

Mier hei z’glichä Ziil gha wie d’Lisa bi ihrem Chleid – uf Stans.
Dä Ort kennä ig ja beschtens…ha ig doch knapp 2 Jahr praktisch näbä däm Lade ire WG gwohnt gha (1 Minute z’Fuess).

Acho ir Herrä-Abteilig heimer scho  z’erschte Mal gstuuned…es hed doch gad es paar Azüg zur Uswahl!

Und de isches fir mi scho los gange….Probehemmli alegä und ab i die erschde Vestons.

Zum Glick hei miner Begleiter gueti Närve gha:

• jääää…dä isch mer e chli z dunkel…lieber chli heller.
• uuhh nei das isch de scho wiedr z hell…
• Ja mol dä gfallt mer doch gued, mues dä aber no komplett alegä…dä chunnt sicher eis i di enger Uswahl
• NEI das gfallt mer nid a mier…
• Potz dä gsehd de gued us….o dä näme mer i di enger Uswahl!
• Mmh…bi nid ganz sicher, aber dä probiere ig o mal no ganz a

Es hed also doch gad e Moment bruchd bis ig mini engeri Uswahl zämä gstellt ha gha!

So und etz wird die enger Uswahl jewils no kompett agleid.

1. Boah…dä Azug chani gued a mier vorstellä – aber mier probierä mal no di andere
2. Jää…dä Azug wirds doch nid…da gfallt mier dr erschd doch besser
3. Ufff…etz wirds nid eifach – o dä Azug gfallt mier sehr gued

O etz bruchä miner Begleiter wieder gueti Närve (obwohl si scho wissä wellä das es wird sii….).
Ha i doch dr erschd und dritt Azug immer wieder hin und här miesse probierä bis ig mi due doch ha chenne entscheidä!

Es isch mii 3. Azug 😀

Miner Begleiter hei Rächt gha…das hei si sofort gwisst!

Etz hei mier iis alli e chlini Belohnig verdient gha – es Cüpli (Bier hez nid gha).

Siid ier alli scho gspannd was firne Azug das es isch wordä? Also d’Lisa chas fasch nimme erwartä dä Azug z’gseh…(si muess ja nume no 216 Täg druf warte).