Wottsch du mii Frou wärde? Ja, natiirlech!
Der Tag der Tage. Äs isch dr 19. Mai 2020 – dr Lisa ihre 25. Geburtstag. Mitz im 1. Corona-Lockdown. Carol hed groooosses vor…!
„Am 9i geiz los. Leisch eppis gäbigs a, wie we mer gä ga wandere. Underwägs giz ä brönsch.“ Gesagt getan. Am 9i sii mier losgfahre und hei no ä Zwischehalt bi Steiningers gmacht. Aha, darum also dr Rucksack. Mier näme iisers Zmorge sälber mit. Super Idee. Schliesslech hei mier hiit ä wunderscheenä Tag mit 30°.
Ab Steiningers hed d’Lisa miesse d’Ouge verbinde. Sie hed jewils mitgrate wo dass ächt diri geid. Eppä bim Rybiwäg z’Brienz isch z’20i ghiid – mier gä richtig Milibachsgraben. Es wunderscheens Plätzli, wos mi immer wieder häräziehd…
Ufem Land an Obermad hez es super feins Zmorgä gä. Irgendwenn hed Carol där moorz gross Laptop us siim Rucksack zoubered und nä mier id Hand drickt. Äs sälber zämägschdellds Filmli mit Fotos vo iisne gmeinsame Jahr. Aber no nid gnueg – Carol chneuled pletzlech vor dr Lisa härä und nachere Liebeserklärig (wo d’Lisa no hiit nid uf d’Reihe uberchunnd wil sech dr Kopf mal schnäll hed verabschieded) stelld er die alles entscheidend Frag:
„Wottsch du mii Frou wärde?“
Ja, natiirlech! Was firne Frag. D’Lisa hed scho gmeind es chäm nie meh so wiit.
Am Namittag sii d’Eltere und Fründe iglade gsii zum Zvieri. Die grosse Niuigkeite hei sofort miesse verchinded wärde. Schnäll schnäll hei mier es Chärtli kreiert mit em Verwiis uf iisi Homepage – die hed Carol scho erschdelld gha.
Was firne Geburtstag! Und das im grosse Coronachaos…
